台文醫師作家陳雷，回顧人生80 ê kāu kap甘
　　寫hō͘一代koh一代勇敢ê台灣少年人

　　長年tòa加拿大ê台語文運動者、醫師作家陳雷，筆路媠氣活跳，創作文類多元豐富，以至高ê評價khiā tī台語文學、台灣文學史ê重要地位。這本《咱人ê視界》散文集，是伊beh透由束結、趣味ê短文，hō͘學生、少年朋友、台文初學者有通親近台語、學習台語，進一步思考台灣文化kap未來ê讀本，也是伊思念土地、人生回顧、思想精華ê文字素描。

　　本冊分做5輯，「美麗鄉土」收入祖國台灣、家鄉台南ê風土景緻kap歷史記持，牽挽對土地認同ê關心kap思考；「小小故事」記錄一寡聽來ê、心適ê趣味古；「咱ê話語」是作者對台灣話、台語文、台灣文化傳承發展ê論述kap建議；「趣味科學」收入幾篇科學性、智識性ê短文，用台語論萬項代；「哲學人生」有作者對年歲性命ê體會，對社會價值、道德價值、政治價值ê探討，對人、大自然、大宇宙ê理解，鼓勵咱追求、擴大家己外在ê視界，起造心內ê心界。